Labadii Hadiyadood Ee Cirfiidka

Cirfiid ayaa mar dhex mushaaxaysay iyadoo u eg habar duq ah oo faqiir ah. Habeen ayaa u dumay iyadoo ku socota waddo miyi ah. Waxay dhaaftay beero iyo kaymo ilaa ay ka timid laba guri.
Mid, weyn oo qurux badan, waxaa lahaa nin taajir ah. Midka kalena wuxuu ahaa waab yar oo uu lahaa nin faqiir ah.
Cirfiiddii waxay is tiri, «Dhib kuma noqon doonto ninka taajirka ah inuu i siiyo meel aan gabaadsado.»
Sidaas darteed waxay tagtay albaabkiisa wayna garaacday. Wuxuu furay albaab oo ku dhawaaqay,
«Waa kuma halkaas? Maxaad doonaysaa?»
«Waddadii ayaa iga luntay, habeenkiina waa dhow yahay,» ayay tiri cirfiiddii. «Waxaan kaa baryayaa inaad i siiso meel aan gabaadsado.»
Ninkii taajirka ahaa ayaa madaxa ilaa lugaha ka eegay. Kadib madaxuu ruxay oo yiri,
»Kuma soo gelin karo. Haddii aan soo geliyo nin iyo naag kasta oo faqiir ah oo soo garaaca albaabkayga, aniga qudhayda ayaa dhawaan tuugsade noqon doona. Iska soco waddadaada.»
Kadib wuxuu xiray albaabkii oo bannaanka uga tagay.

Gurigiisa ayay dhabarka u jeedisay oo waxay aadday aqalkii yaraa. Isla markii ay garaacday, ninkii faqiirka ahaa ayaa albaabka furay oo ka codsaday inay soo gasho.
«Waxaad u egtahay mid daallan,» ayuu yiri, «waqtiguna wuu daahay. Waa inaad habeenka nala qaadataa.

Xaaskiisii ayaa markaas soo hor martay.
«Wax badan ma haysanno, haweeneyda wanaagsanay,» ayay tiri. «Laakiin wixii aan haysanno waan wadaagaynaa, si niyad sami ah.»
Waxaa dabka saarnaa oo karayay xoogaa baradho ah, haweeneydiina waxay soo saartay baaquli rooti iyo caano ah. Cashadu way fiicnayd, sababtoo ah waxaa dhadhan u yeelay nabad iyo farxad.

Markii la gaaray waqtigii hurdada, ayay naagtii ninkeedii gees ula baxday.
"Ninkaygii qaaliga ahow," ayay tiri, "Aan inagu samaysano sariir caws ah. Markaas haweeneydan miskiinta ah waxay jiifsan kartaa sariirteena oo ay nasan kartaa. Way duqowday, ka dib markii ay socotay maalintii oo dhan, waa inay daallan tahay."
"Qalbigayga oo dhan," ayuu yiri ninkii.
Cirfiidku ma rabin inay sidaas sameeyaan, laakiin ma aysan aqbalin "maya." Sidaas darteed waxay ku nasatay sariirtoodii, iyaguna waxay ku seexdeen xirmo caws ah.

Subaxdii, naagtii ayaa kacday oo quraac karsatay. Qorraxda ayaa qolka soo iftiimisay, wejiyada ninka iyo naagtuna waxay u ifayeen sida maalinta oo kale.
Quraacda ka dib, cirfiidadii ayaa u mahadcelisay oo macsalaamaysay.
Laakiin markay albaabka joogtay ayay soo jeesatay oo tiri:
«Wanaag baad ii sameyseen markaad u malaynayseen inaan faqiir ahay oo aanan waxba idinku abaal gudi karin. Si aan idiin tuso inaan leeyahay rabitaanka iyo awoodda aan idinku caawiyo, waxaan idin oggolaan doonaa saddex codsi.»
«Maxaan kale oo aan codsan karaa,» ayuu weydiiyay ninkii, «oo aan ahayn in labadeenna, inta aan nool nahay, aan caafimaad qabno oo xoog yeelanno, iyo inaan helno cunto nagu filan oo aan cunno? Ma ka fekeri karo codsi saddexaad.

Miyaanaydin jeclayn guri cusub?» ayay weydiisay cirfiidadii, iyadoo dhoollacaddaynaysa.
«Oo, haa,» ayay ku dhawaaqeen god-qodihii iyo xaaskiisii, «waannu jeclaan lahayn. Haddii saddexdan rabitaan naloo fuliyo, wax kale ma doonayno.»
Cirfiidadii waxay gurigii hore u beddeshay mid cusub, ka dibna jidkeedii ayay iska sii martay, iyadoo u ballanqaadaysa in rabitaannadooda kaleba la fulin doono.

Abbaaro duhurkii ayuu ninkii taajirka ahaa si kadis ah daaqaddiisa uga soo eegay. Layaabkiisa, wuxuu arkay aqalkii cusbaa. Wuxuu ku dhaygagay waqti dheer.
Markaas wuxuu u yeeray xaaskiisii wuxuuna ku yiri:
"Shalay waxaa waddada dhankeeda kale ku yiil aqal duq ah oo liita. Maanta waxaa isla goobtaas ku yaal mid cusub oo qurux badan. Orod u tag oo weydii sida ay arrintan ku dhacday."
Xaaskii ayaa tagtay waxayna weydiisay qodaalkii, "Sidee hal habeen gudaheed aad guri cusub ugu heshay beddelka midkaagii duqa ahaa?

Waan kuu sheegi doonaa,“ ayuu yiri.
“Shalay fiidkii haweeney miskiin ah ayaa timid albaabkeena oo na weydiisatay meel ay u hoyato habeenkii. Saaka waxay noo sheegtay inay tahay cirfiid, oo ay na siin doonto saddex codsi. Waxaan codsanay caafimaad iyo cunto maalinle ah, ka dibna waxay u beddeshay gurigeenii aqalkan cusub oo quruxda badan.

Naagtii ninkii taajirka ahaa ayaa dib u orodday si ay ninkeeda ugu sheegto warkan.
«Waan is-garaaci lahaa!» ayuu ku qayliyay. «Haddii aan uun ogaan lahaa inay ahayd cirfiid! Show, waxay marka hore timid albaabkayga, iyadoo u ekayd qof miskiin ah oo duq ah oo dawarsanaya. Waxay i weydiisatay inaan hoy siiyo, anna waxaan ku iri ‘maya.’

Alla maxay nasiib darro tahay!» ayay tiri xaaskiisii. «Laakiin dhaqso oo fuul faraskaaga oo ka daba tag. Haddii aad ka daba gaarto, ka bari inay inoo oofiso saddex rabitaan sidoo kale.

Ninkii taajirka ahaa wuxuu kooreeyay faraskiisii ugu fiicnaa, wuxuuna si xawli ah uga daba orday cirfiiddii. Ugu dambayntii, wuu soo gaaray. Wuxuu ula hadlay si aad u dabacsan oo naxariis leh. «Waxaan rajaynayaa inaadan ii xanaaqsanayn maadaama aanan xalay ku soo dhowayn,» ayuu yiri. «Waxaan lumiyay furihii albaabka guriga. Intii aanan helin ka hor, waad iska sii socotay. Haddii aad mar kale waddadeena soo marto, waa inaad nala joogtaa.»
«Haa,» ayay tiri, «Waan yeeli doonaa, haddii aan waligay mar kale waddadaada soo maro.»
Markaas ayuu ninkii taajirka ahaa weydiistay inay u oggolaato saddex codsi sidii ay u yeeshay deriskiisii faqiirka ahaa.
«Wax faa'iido ah kuuma laha,» ayay tiri cirfiiddii. «Maxaa jira oo aad u baahan tahay inaad codsato?»
«Oh,» ayuu ku dhawaaqay ninkii taajirka ahaa, «Waxaan hubaa inaan heli karo wax aan doonayo.»
«Aad bay u fiican tahay,» ayay tiri cirfiiddii, «dib ugu noqo guriga. Saddexda codsi ee ugu horreeya ee aad samayso waa la oofin doonaa.

Ninkii taajirka ahaa wuxuu aad ugu mashquulsanaa ka fikirida rabitaankiisa oo uu dayacay inuu si adag u qabto xakamaha. Faraskiisii ayaa bilaabay inuu boodboodo oo uu si waali ah u haraatiyo.
»Is deji, Bess," ayuu yiri.
Laakiin faraskii wuxuu noqday mid sii madax adag. Isagoo careysan, ayuu ku qeyliyay,
"Joog, Bess! Waa maxay buuqan oo dhan? Waxaan jeclaan lahaa inaad iska dhacdo oo aad ahaato mid aamusan oo dhego la'!

Isla markii ay erayadu afkiisa ka soo baxeen, faraskii ayaa hoostiisa ku dhacay, isagoo noqday carrab la« iyo dhego la», isagoo aan awoodin inuu maqlo ama ka jawaabo amarradiisa. Wuxuu si kama' ah u isticmaalay rabitaankiisii ugu horreeyay, waana uu rumoobay.
"Hagaag, ugu yaraan weli waxaa ii haray laba rabitaan," ayuu niyadda iska yiri.

Ma uusan jeclayn inuu faraska, kooraha, iyo xakamaha kaga tago waddada dhexdeeda. Sidaas darteed, wuxuu adeegsaday xooggiisa oo dhan si uu u jiido faraska, ka dibna wuxuu dhabarkiisa saaray xakamaha iyo kooraha, wuxuuna bilaabay inuu lug ku aado guriga. Qorraxda duhurku way gubaysay. Lugaynta iyadoo la sido culeys intaas le'eg waxay ahayd mid kulul oo daal badan. Wuxuu ka fikiray sida ay xaaskiisu u qabowsantahay, iyadoo si raaxo leh guriga ugu fadhida. Haddana, iyada ayaa ahayd tii ku dhiirrigelisay inuu ka daba tago cirfiidka.

Aa! Waxaan jeclaan lahaa in koorahan uu ku dhego dhabarkeeda,“ ayuu hoos u yiri, isagoo aan ka fiirsan cawaaqibka erayadiisa. Isla markii uu hadlay, koorihii ayaa ka siibtay dhabarkiisa. In kasta oo ay kulayd ahayd, wuxuu u degdegay guriga sida ugu dhaqsiyaha badan ee uu awoodo. Halkaas, wuxuu ugu tagay xaaskiisa oo fadhida iyadoo koorihii uu ku dheggan yahay dhabarkeeda, oo ooyaysa maxaa yeelay way iska bixin kari wayday.

“Ha ka welwelin wax sidaas u yar,“ ayuu yiri. “Waxaan inoo rajayn doonaa inaan helno dhammaan hantida adduunka, rajadaasna way rumoobi doontaa haddii aad u ogolaato in kooruhu ku saarnaado.»
«Doqon yahow,» ayay ku qaylisay, «maxay ii tari lahayd hantidaas oo dhami haddii koorahani dhabarkayga saarnaado maalmahayga oo dhan? Maya, maya! Adigaa rajeeyay inuu i saarnaado, haddana waa inaad rajaysaa inuu iga dhaco.»
Isagoo aad u diiddan, waxaa qasab ku noqotay inuu rajeeyo in kooruhu dhabarkeeda ka dhaco. Isla markiiba dhulka ayuu ku dhacay.

Ninkii taajirka ahaa wuxuu sameeyay dhammaan saddexdiisii codsi. Waxay u keeneen oo keliya cadho iyo dhibaato, erayo adag oo ka yimid xaaskiisii, iyo lumitaanka faraskiisii. Dhanka kale, saddexdii codsi ee ninkii miskiinka ahaa ee naxariista badnaa, qanacsanaana waxay ka xoreeyeen walwalka ilaa dhammaadka cimrigiisa.